Xafladda Qalinjabinta Dufcadda 8aad ee Dugsiga Al-shacab & Furitaanka Sanad-dugsiyeedka 2017-2018 oo lagu qabtay Dugsiga Al-shacab

Xaflad si heer sare ah loosoo agaasimay  ayna kasoo qeybgaleen, siyaasiyiin, culumaa’uddiin, waxgarad, aqoonyahano, odayaal dhaqameed iyo qeybaha kala gaddisan ee bulshada  ayaa lagu qabtay Dugsiga H/Dhexe & Sare Al-shacab.

Xafladda oo ahayd Xafladda Qalinjabinta Dufcadda 8aad ee Dugsiga Al-shacab iyo furitaanka sanad-dugsiyeedka cusub 2017/2018 waxaa ugu horeyntii ka hadlay maamulaha Dugsiga Al-shacab mudane C/casiis Maxamed Aadan oo kasoo qeybgalayaasha kusoo dhaweeyay xafladda isla markaana uga mahadceliyay kasoo qeybgalkooda.

Maamulaha Dugsiga wuxuu u hambalyeeyay ardayda qalinjebisay oo tiradoodu ahayd 69 arday, 39 kamid ahna ay wiilal ahaayeen.

“Waxaan idiinku hambalyaynayaa dadaalkii aad muujiseen iyo guushii aad ka gaarteen Imtixaanka Qaran 2016-2017, waxaana ku faraxsan nahay inaad sadexda kaalin ugu horeysa ka gasheen gobolka mudug iyo inaad kamid noqoteen 50 arday ee ugu sareysa Imtixaanka Qaran” ayuu yiri maamulaha Dugsiga. Sidoo kale wuxuu maamulaha u mahadceliyay aasaasayaashii dugsiga, maamulayaashii ka horeeyay, hay'adda Himilo oo dugsiga dhistay iyo cid walba oo ka qeyb qaadatay muruq, maal ama fikirba.

Waxaa dadka soo jiitay bandhig cilmiyeedka ay soo bandhigeen ardayda Dugsiga kuwaasoo isugu jiray soo dhawayn, mahadcelin, fariimo caafimaad, murti , diin, iwm

Xildhibaan  “C/qaadir Cali Diirshe ( Wadaad Yare)  oo ka tirsan xildhibaanada Galmudug oo xafladda ka hadlay ayaa isaguna u hambalyeeyay ardayda qalinjebisay kuna amaanay kaalmaha ay galeen.

Dhammaan dadkii meesha ka hadlay waxay u hambalyeeyeen qalinjebiyayaasha iyo guusha ay soo hoyeen waxayna kula dardaarmeen ardayda kale in sanadka soo socda dadaal xoogan bixiyaan.

Ugu dambayntii, waxaa abaalmarino la guddoonsiiyay ardaydii kaalmaha gashay sanad-dugsiyeedka 2016-2017 iyo ardayga ku guulaystay abaalmarinta Xiddiga Sanad-dugsiyeedka 2016-2017, waxaana shahaaddo sharaf la guddoonsiiyay hay'adda Himilo oo dugsiga dhistay, CISP iyo waalidka ugu firfircoonaa xiriirka joogtada ahna la lahaa dugsiga sanad-dugsiyeedkaan, waxaana meesha laga sheegay in sadexda arday ee ugu sareysa heleen deeq waxbarasho oo dalka Suudaan ah.

Xafladda waxay kusoo gabagabowday jawi degan iyadoona kamid noqotay wararka ugu hadal heynta badan ee bulshada Gaalkacyo isla dhex maraan. 

"Waqti kooban iyo waxqabad ballaaran"

Ardayda Dugsiga H/Dhexe & Sare Al-Shacab oo u fariistay Imtixaanka Dhammaadka Sanad-dugsiyeedka 2016/2017

Waxaa maalintii saddexaad si habsami leh uga socda Dugsiga H/Dhexe & Sare Al-shacab Imtixaanka Sanad Dhamaadka 2016/2017.

Ardayda Dugsiga oo tartan ugu wada jira kaalmaha hore iyo sidii ay dhibcaha ugu sareeya ku heli lahaayeen waxaa maalmihii lasoo dhaafay ka muuqday dadaal iyo aqris fara badan, waxaana la arkayay iyagoo koox koox isu ballansanaya si ay duruusta u wada naqtiimaan.

Guddoonka Waxbarashada Gobolka Mudug ee Galmudug mudane Axmed Jaamac Qoodooye ayaa soo kormeeray habsami u socodka imtixaanka isagoona fasal fasal u galay dhammaan fasallada ay ardayda imtixaanka ku galayeen.

Mudane Qoodeeye wuxuu aad u amaanay Dugsiga Al-shacab sida wanaagsan oo ay howshooda u wadaan waxuuna amaan gooni  ah u jeediyey maamulka, macalimiinta iyo  Guddiga Waxbarashada Dugsiga.

Sanad-dugsiyeedkaan ardayda wuxuu u ahaa mid adag iyagoo lasoo kulmay labo bilood oo colaado iyo barakac ah iyo abaar daba dheeraatay. Hase yeeshee maamulka iyo macallimiinta dugsiga waxay bixiyeen dadaal dheeraad ah si ay usoo kabaan waqtigii ardayda kaga lumay colaadda magaalada ka jirtay taasoo habacsanaan ku keentay qorsho sanadeedkii waxbarasho iyagoona hirgaliyay qorsho cusub kaasoo miradhalkiisu noqday in si habsami leh ardayda duruusta ugu dhamaato.

Dhammaan maamulka, macallimiinta iyo Guddiga Waxbarashada Dugsiga waxay ardayda u rajeynayaa guul iyo horumar.

Guddoonka Waxbarashada Gobolka oo kormeeraya imtixaanka

Ardayda Dugsiga Al-shacab oo maanta u fariistay Imtixaanka Teeramka 1aad

Ardayda Dugsiga H/Dhexe & Sare Al-Shacab ee magaalada Gaalkacyo ayaa maanta u fariistay Imtixaanka Teeramka 1aad ee Sanad - Dugsiyeedka 2016 - 2017.

waxay saakay u ahayd maalin ay kusoo bandhigayeen qiimeynta heerka ay fahamka, aqriska iyo dadaalka ka joogaan mudadii sanadka barkiisa ahayd ee ay wax dhiganayeen.

Ardada Dugsiga Al-Shacab oo deeq lacageed ku wareejiyay Guddiga Gurmadka Abaaraha ee Magaalada Gaalkacyo

Kadib dadaal iyo ololo xoogan oo lacag ururin ah ay wadeen ardada Dugsiga Al-shacab si loogu gurmado dadka ay abaaruhu naafeeyeen, waxaa maanta u suuragashay inay Guddiga Gurmadka Abaaraha ee Magaalada Gaalkacyo ku wareejiyaan lacag dhan sh. 17, 500, 000 (toddobo iyo toban milyan iyo shan boqol oo kun shilin Soomaali).

Madaxa suuq geynta Shirkadda Hormuud xarunteeda Gaalkacyo oo xariga ka jaray minbarka cusub ee Dugsiga Al-Shacab ay u dhiseen.

Madaxa suuq geynta Shirkadda Isgaarsiinta Hormuud xarunteeda Gaalkacyo mudane C/qaadir Cali Cabdi ayaa xariga ka jaray minbar cusub oo shirkadda maalgalisay kaasoo loogu talo galay inuu ardada ka saacido xilliga Daabuurka. 

Ardada dugsiga oo ku kala geddisan xaga dhererka, waxaa ardada gaagaabani caqabad ka heysatay inay si toos ah u arkaan barnaamijyada iyo khudbadaha ka baxa safka (daabuurka) xilliga subixii, kuwaasoo muhiim u ah ardada, iyagoona ku tababarta habka wax jeedinta, aqriska, qoraalka iyo hal- abuuridda.

Dugsiga H/Dhexe & Sare Al-Shacab oo dib u furmay

Waxaa maanta dib u furmay Dugsiga H/Dhexe & Sare Al-Shacab kadib dagaalkii ka qarxay magaalada Gaalkacyo 7dii bisaha Oktoobar ee ...

Guddoomiyaha Himilo iyo wafdi uu hogaaminayo oo booqasho ku yimid dugsiga Al-shacab

Xubnaha wafdiga

Wafdi uu hogaaminayo guddoomiyaha hay'adda Himilo mudane Maxamed Cali Faarax oo ka kala yimid Kanada iyo Muqdisho ayaa subaxnimadii axadda 9/10/2016 waxay soo booqdeen dugsiga, iyagoona ardada kala hadlay safka (daabuurka). Guddoomiyaha waxaa safarkiisa ku wehlinayay ...